Brüssel şəhərində keçirilmiş 6-cı Avropa İttifaqı–Azərbaycan Təhlükəsizlik Dialoqu üzrə Birgə Mətbuat Açıqlaması
22 may tarixində Avropa İttifaqı və Azərbaycan Brüsseldə altıncı Təhlükəsizlik Dialoqu görüşünü keçirdilər.
Görüş iştirakçıları Avropa İttifaqı ilə Azərbaycan arasında ikitərəfli münasibətlərin mövcud vəziyyəti, eləcə də qarşılıqlı maraq doğuran aktual xarici siyasət və təhlükəsizlik məsələləri üzrə açıq və konstruktiv fikir mübadiləsi apardılar. Onlar ikitərəfli münasibətlərdə yeni bir mərhələnin başlanması istiqamətində tərəflərin ortaq maraqlarını nümayiş etdirən son yüksək səviyyəli təmasları alqışladılar.
Avropa İttifaqı və Azərbaycan xarici siyasət və təhlükəsizlik məsələləri üzrə mütəmadi fikir mübadiləsini davam etdirmək barədə razılığa gəldilər. Eyni zamanda, enerji və nəqliyyat bağlantıları sahəsində əməkdaşlığın dərinləşdirilməsi potensialı da müzakirə edildi. Aİ regional əməkdaşlığın vacib rolunu vurğuladı. Azərbaycan isə Aİ-nin onun ən böyük ticarət tərəfdaşı olduğunu qeyd etdi. Aİ Azərbaycanın etibarlı qaz təchizatçısı kimi Avropanın enerji təhlükəsizliyindəki əhəmiyyətini önə çəkdi. Tərəflər, həmçinin Aİ-Azərbaycan Tərəfdaşlıq və Əməkdaşlıq Sazişi çərçivəsində ikitərəfli əməkdaşlığın bütün istiqamətləri üzrə mənalı işin vacibliyini vurğuladılar. COP29-a ev sahibliyi edən Azərbaycan bərpa olunan enerjinin artırılması üzrə öhdəliklərini və ambisiyalarını bir daha bəyan etdi.
Azərbaycan, Aİ-nin mina təmizləmə səylərinə göstərdiyi dəstəyə görə təşəkkürünü bildirdi. Aİ isə bərpa işlərinə töhfə verə biləcək Avropa alətlərindən istifadə imkanlarını araşdırmağa hazır olduğunu bildirdi. Azərbaycan, Avropa Sülh Mexanizminə rəsmi müraciətini bir daha təsdiqlədi.
Tərəflər Ermənistan və Azərbaycan arasında münasibətlərin normallaşdırılması prosesində növbəti addımlar barədə müzakirələr apardılar.
Görüşə Avropa Xarici Fəaliyyət Xidmətinin Siyasi məsələlər üzrə baş katibinin müavini Olof Skooq və Azərbaycan Respublikası Prezidentinin köməkçisi Hikmət Hacıyev sədrlik etdilər.
