2016-09-20
Xarici işlər naziri Elmar Məmmədyarovun İslam Əməkdaşlıq Təşkilatının Ermənistanın Azərbaycana qarşı təcavüzünə dair Kontakt Qrupunun İlk İclasında çıxışı

qeyri-rəsmi tərcümə

Azərbaycan Respublikasının xarici işlər naziri Elmar Məmmədyarovun İslam Əməkdaşlıq Təşkilatının Ermənistan Respublikasının Azərbaycan Respublikasına qarşı təcavüzünə dair Kontakt Qrupunun İlk İclasında çıxışı

Nyu York, 19 sentyabr 2016-cı il

Cənab Sədr,

Cənab Baş Katib,

Zati-aliləri, xanımlar və cənablar,

Mən İƏT-in Ermənistan Respublikasının Azərbaycan Respublikasına qarşı təcavüzünə dair Kontakt Qrupunun ilk iclasını təşkil etdiyinə və eyni zamanda iclasa sədrlik etdiyinə görə Baş Katib cənab İyad Amin Mədəniyə təşəkkürümü bildirmək istərdim. Qrupun üzvlərini ehtiramla salamlayır və onların hər birinə Kontakt Qrupa qoşulduqları üçün minnətdarlığımı bildirirəm.

İƏT Kontakt Qruplarının təsis edilməsi Təşkilat üçün mühüm əhəmiyyətə malik məsələlərə İƏT Üzv Dövlətlərin daha çox diqqət yetirməsi üçün uğurlu təcrübə olmaqda özünü sübut etmişdir. Bu baxımdan mən inanıram ki, bu Kontakt Qrupun iclasları Ermənistan-Azərbaycan münaqişəsi ilə bağlı Azərbaycanın Dağlıq Qarabağ regionu və ətraf ərazilərindəki son vəziyyət barədə İƏT Üzv Dövlətlərini məlumatlandırmaq və münaqişənin nizamlanması prosesinə İƏT-in mümkün töhfələrinə dair fikir mübadiləsi aparmaq üçün fürsət olacaqdır.

Dəyərli həmkarlar,

Bildiyiniz kimi, Ermənistan Respublikası Azərbaycana qarşı müharibəyə başlatmış və güc tətbiq etmiş, Azərbaycanın Dağlıq Qarabağ regionu və yeddi ətraf rayon da daxil olmaqla, ərazisinin beşdə birini işğal etmişdir, bir milyondan çox azərbaycanlı əhalini didərgin salmaqla işğal edilmiş ərazilərdə etnik təmizləmə aparmış və münaqişə dövründə digər ağır cinayətlər törətmişdir.

Beynəlxalq ictimaiyyət dəfələrlə Azərbaycana qarşı hərbi güc tətbiqini və nəticə olaraq ərazilərinin işğalını pisləmişdir. 1993-cü ildə BMT Təhlükəsizlik Şurası Azərbaycana qarşı güc tətbiqini və ərazilərinin işğalını qınayan və Azərbaycanın ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığını bir daha təsdiq edən 822 (1993), 853 (1993), 874 (1993) və 884 (1993) saylı qətnamələr qəbul etmişdir. Bu qətnamələrdə Təhlükəsizlik Şurası bir daha Dağlıq Qarabağ regionunun Azərbaycanın ayrılmaz hissəsi olduğunu təsdiq etmiş və işğalçı qüvvələrin Azərbaycanın işğal olunmuş ərazilərindən dərhal, tam və qeyd-şərtsiz çıxarılmasını tələb etmişdir. BMT Baş Assambleyası münaqişəyə dair üç qətnamə (20 dekabr 1993-cü il tarixli, 48/114 saylı, 7 sentyabr 2006-cı il tarixli, 60/285 saylı və 14 mart 2008-ci il tarixli, 62/243 saylı) qəbul etmiş və 2004-cü ildən etibarən “Azərbaycanın işğal edilmiş ərazilərində vəziyyət” adlı xüsusi bənd BMT Baş Assambleyası sessiyalarının gündəliyinə daxil edilmişdir.

Ermənistan və Azərbaycan arasında münaqişə baş verdikdən sonra İƏT BMT Təhlükəsizlik Şurasının müvafiq qətnamələrinə əsaslanaraq, Ermənistanın Azərbaycan ərazilərindəki hərəkətlərini açıq-aşkar təcavüz adlandırmış və Azərbaycana qarşı güc tətbiqini və onun ərazilərinin işğalını ən kəskin şəkildə pisləmişdir. Fürsətdən istifadə edərək, Azərbaycanın haqlı mövqeyini dəstəklədikləri və bununla bağlı həmrəylik göstərdikləri üçün İƏT Üzv Dövlətlərə öz təşəkkürümü bildirmək istərdim. 

Silahlı münaqişənin başlanmasından iyirmi dörd il keçmişdir. Buna baxmayaraq, BMT Təhlükəsizlik Şurası və Baş Assambleyasının qətnamələrinə, İƏT və digər beynəlxalq təşkilatların qərarlarına və ayrıca Dövlətlərin mövqelərinə məhəl qoymayaraq və beynəlxalq hüququn hamılıqla qəbul edilmiş norma və prinsiplərini kobul şəkildə pozaraq, Ermənistan Azərbaycan ərazilərini qanunsuz şəkildə işğal altında saxlamaqda davam edir.

Ermənistan işğal edilmiş ərazilərdə öz hərbi potensialını gücləndirməklə, əraziləri demoqrafik, mədəni və fiziki cəhətdən dəyişməklə, zorla didərgin salınmış yüz minlərlə azərbaycanlı əhalinin öz doğma yurd-yuvalarına və mülklərinə qayıtmasının qarşısını almaqla işğala əsaslanan mövcud status-kvonu daha da möhkəmləndirmək üçün səy göstərməkdə davam edir.

Bundan əlavə, atəşkəsin müntəzəm şəkildə pozulması, Ermənistan və Azərbaycan silahlı qüvvələrinin təmas xətti və iki dövlət arasındakı sərhəd boyunca yerləşən şəhər və kəndlərə hücumlar son zamanlar daha mütəmadi və zorakı xarakter almış və çoxlu sayda azərbaycanlı mülki əhalinin öldürülməsi və yaralanması ilə nəticələnmişdir. Ən son bu ilin aprel ayının əvvəllərində Ermənistan Azərbaycanın mülki əhalisinə qarşı genişmiqyaslı hücumlar həyata keçirmişdir.

Aprel hadisələri qabarıq şəkildə göstərdi ki, beynəlxalq ictimaiyyət tərəfindən qeyri-davamlı və qəbuledilməz hesab olunan status-kvo təhlükəlidir və gözlənilməz nəticələr ilə hər an gərginliyin artması ehtimalı vardır.

Ermənistan anlamalıdır ki, status-kvo və silahlı təxribatlara uymaq çox ciddi səhvdir. Azərbaycan Ermənistandan işğal olunmuş ərazilərdə öz hərbi mövcudluğunu dayandırmağı və həlli uzanmış münaqişənin siyasi həllini tapmaq üçün xoş niyyətlə Azərbaycanla danışıqlara başlamağı gözləyir. Ermənistan nə qədər tez öz qoşunlarını Azərbaycanın işğal olunmuş ərazilərindən çıxarsa, bir o qədər regional təhlükəsizlik üçün faydalı olar. 

Cənab Sədr,

Ermənistanı beynəlxalq öhdəliklərini yerinə yetirməyə məcbur etmək üçün birgə səy göstərilməsinin və Ermənistanın təcavüzünə və Azərbaycan ərazilərinin işğalına son qoymaq üçün belə effektiv siyasi və iqtisadi tədbirlər görmək məqsədilə İƏT tərəfindən Üzv Dövlətlərə və beynəlxalq ictimaiyyətə davamlı çağırışlar edilməsinin vacibliyini nəzərə alaraq, İƏT Kontakt Qrupunun təsis edilməsi və onun effektif fəaliyyəti böyük əhəmiyyətə malikdir. Biz inanırıq ki, bu Kontakt Qrup çərçivəsində müzakirələr müvafiq İƏT qətnamələrinin həyata keçirilməsinə öz töhfəsini verəcək və bu xüsusda İƏT Üzv Dövlətlərinin ayrıca və birgə səylərini tarazlaşdırmağa kömək edəcəkdir. 

Yekun olaraq, mən İƏT-in Ermənistan Respublikasının Azərbaycan Respublikasına qarşı təcavüzünə dair Kontakt Qrupuna uğurlu başlanğıc və məhsuldar müzakirələr arzulamaq və bir daha bu Kontakt Qrupun məqsəd və məramlarının müəyyənləşdirilməsi və həyata keçirilməsində öz dəyərli dəstəkləri üçün İƏT Baş Katibi cənab İyad Amin Mədəni və onun peşəkar kollektivinə təşəkkürümü bildirmək istərdim.

Sağ olun!

növbəti xəbər əvvəlki xəbər

 

 

Tərcümeyi-hal



FUAD ELDAR OĞLU İSGƏNDƏROV


Doğulduğu tarix və yer: 6 avqust 1961-cı il, Bakı, Azərbaycan


 Təhsil və təlim proqramları:

1978-1983

Bakalavr - Beynəlxalq iqtisadi münasibitlər / İngilis dili üzrə tərcümə, Beynəlxalq münasibətlər və beynəlxal hüquq institutu, Kiyev Milli Universiteti

1999 (noyabr)

Böhranların idarə edilməsi üzrə ixtisasartırma təlim proqramı, Beynəlxalq Hüquq-Mühafizə Akademiyası, Budapeşt, Macarıstan

2001 (may-iyun)

2002 (iyul) 

Qara Dəniz ixtisasartırma proqramı, C.F. Kennedi İdarəçilik Məktəbi, Harvard Universiteti, ABŞ

Qanunvericilik üzrə ixtisasartırma kursları, ABŞ Dövlət Departamenti, ABŞ Ədliyyə Departamenti

2006 (yanvar)

Milli Hərbi Strategiya üzrə Seminar, Corc Marşal adına Avropa Təhlükəsizlik Araşdırmaları Mərkəzi 

 İş təcrübəsi

1986-1995

Hərbi xidmət

1995-2002

İnformasiya və təhlil idarəsinin rəisi, Azərbaycan Respublikasının Milli Təhlükəsizlik Nazirliyi

2002-2006 

Azərbaycan Respublikasının milli təhlükəsizlik nazirinin müavini

2006-2007 

Xüsusi tapşırıqlar üzrə səfir, Azərbaycan Respublikasının Xarici İşlər Nazirliyi                                   Yunesko üzrə Azərbaycan Milli Komissiyasının baş katibi

2007-2012

Azərbaycan Respublikasının Niderland Krallığında fövqəladə və səlahiyyətli səfiri

Azərbaycan Respublikasının Kimyəvi Silahların Qadağan Edilməsi üzrə Təşkilat yanında daimi nümayəndəsi

 

2012- indiyədək Azərbaycan Respublikasının Belçika Krallığı və Lüksemburq Böyük Hersoqluğunda fövqəladə və səlahiyyətli səfiri, Azərbaycan Respublikasının Avropa İttifaqı yanında Nümayəndəliyinin rəhbəri


Tədris və elmi fəaliyyət

1983-1986

Aspirant və dosent, Siyasi iqtisadiyyat kafedrası, Azərbaycan Dövlət Universiteti 

1984-1985 

Mühazirəçi, Tərcümə nəzərriyyəsi kafedrası, Azərbaycan Dillər Universiteti 

2000-2003

Mühazirəçi, Beynəlxalq münasibətlər kafedrası, Beynəlxal münasibətlər və beynəlxalq hüquq fakultəsi, Bakı Dövlət Universiteti

   
Ailə vəziyyəti:

Evlidir, bir oğlu və bir qızı var

 

Xarici dillər Rus, ingilis, türk

 

PDF versiyası