2016-02-12
Brüsseldə “Ağdam: 5 epizod” filminin təqdimatı olub

Fevralın 11-i Belçikanın Brüssel şəhərində Azərbaycan Respublikasının Prezidenti yanında QHT-lərə Dövlət Dəstəyi Şurasının dəstəyi ilə Belçikanın “Qafqazın Qovuşma Nöqtəsi” təşkilatının çəkdiyi “Ağdam: 5 epizod” filminin təqdimat mərasimi keçirilib. Brüsselin nüfuzlu mədəniyyət tədbirlərinin keçirildiyi “Bozar” İncəsənət Mərkəzində baş tutan təqdimat mərasiminə Azərbaycanın Belçika Krallığındakı fövqəladə və səlahiyyətli səfiri Fuad İsgəndərov, Belçika-Azərbaycan Dostluq Cəmiyyətinin sədri Ayhan Dəmirçi, Brüsseldə akkreditə olunmuş diplomatik korpusun rəhbərləri, QHT nümayəndələri, media orqanlarının təmsilçiləri qatılıb.

 “Qafqazın Qovuşma Nöqtəsi” təşkilatının sədri Mişel İvor mərasimdə çıxış edərək   layihə haqqında ətraflı məlumat verib və filmin hazırlanmasına göstərdiyi dəstəyə görə Şuraya təşəkkürünü  bildirib. Daha sonra film nümayiş olunub. Filmdə Ermənistanın işğalçılıq siyasəti nəticəsində Ağdam şəhərindən olan və məcburi köçkün həyatını yaşayan 5 nəfərin təəssüratları və xatirələri yer alıb. Eyni zamanda Ağdam şəhərinin qədim abidələri, təbiəti, müharibədən əvvəlki və işğaldan sonrakı vəziyyətinə dair kadrlar da filmdə əksini tapıb. Təqdimat mərasimində qeyd olunub ki, əgər Avropa ictimaiyyəti zamanında Ermənistanın Azərbaycana qarşı həyata keçirdiyi işğalçılıq siyasətinə obyektiv və ədalətli münasibət bəsləsəydi, analoji münaqişə ocaqlarının artması nəticəsində hazırki miqrant problemi ilə rastlaşmazdı.

Azərbaycanın Belçika Krallığındakı fövqəladə və səlahiyyətli səfiri Fuad İsgəndərov filmdə Ermənistanın işğalçı siyasətini ifşa edən tutarlı faktlarların yer aldığını deyib. Fuad İsgəndərov qeyd edib ki, Azərbaycan incəsənət vasitəsilə Ermənistan-Azərbaycan, Dağlıq Qarabağ münaqişəsi ilə bağlı həqiqətlərin Avropa ictimaiyyətinə çatdırılması istiqamətində davamı iş aparır.

Avropa-Azərbaycan cəmiyyətinin Belçika nümayəndəliyinin rəhbəri cənab Mark Fervilqen diqqəti “Ağdam. 5 epizod” filmin nümayiş olunan insanlara çəkərək qeyd edib ki, Ermənistanın işğalı nəticəsində doğma şəhərlərindən məhrum olan, maddi-mənəvi cəhətdən ağır itkilərə məruz qalan  köçkünlərdə heç bir nifrət hissi yoxdur. Onlar sadəcə doğma torpaqlarına qayıtmaq istəyirlər. Mark Fervilqen münaqişəyə ilə bağlı BMT Təhlükəsizlik Şurasının qəbul etdiyi 4 qətnamədə Ermənistanın işğalçılıq siyasətinin açıq şəkildə əksini tapdığını və beynəlxalq ictimaiyyətin rəsmi İrəvana təzyiqləri artırmalı olduğunu vurğulayıb. 

növbəti xəbər əvvəlki xəbər

 

bakushop